Mediu Rural presiona a Bodegas Obanca

La cuestión del asturianu llega tamién
al mundu del vinu. La iniciativa d’un
llagar de Cangas del Narcea, Bodegas
Obanca, de sacar al mercáu un
vinu cola etiqueta namás n’asturianu
choca de frente cola Conseyería de
Mediu Rural, que s’opón. L’Alministración
esixe que les etiquetes vaigan,
en tou casu, n’asturianu y castellanu.
Esta iniciativa novedosa –que se
presentaba hai unos díes na villa canguesa
con mui bona acoyida– partió
de Bodegas Obanca. Los oríxenes
d’esta empresa tán nel añu 1953,
cuando María Marcos y el so fíu compren
les viñes d’Oubanca, Castru de
L.lumés y Las Barzaniel.las. Dende
esi momentu empiecen a ellaborar
vinu de Cangas. Nel añu 2002 principien
a comercializalo y la empresa
súmase a la denominación d’orixe
de Vinos de la Tierra de Cangas. Dende
esi momentu, Bodegas Oubanca
empieza a acutar un sitiu dientro del
mundu del vinu, a facer un productu
espectacular y a dar a conocer el vinu
asturiano al mundu.
Vinu L.lumés
La iniciativa de sacar al mercáu un
vinu etiquetao namás n’asturianu anició
hai tiempu na conocida bodega
L’Arbolón, al pie de la capiella de la virxe
del Carme, na nueche de San Xuan,
nuna cena, cuenta David Marcos, responsable
de Bodegas Obanca. Na
parte posterior del etiquetáu va esta
inscripción: «Na nueite de San Xuan,
las l.larimas d’un cangués fixenon que
naciera esti vinu», que ye una dedicatoria
a «una persona qu’ama fondamente
la llingua asturiana. Esta persona
llegó a la cena y dixo que yera
una pena que l’asturianu, como’l vinu
de Cangas, se perdiera», esplica. Estes
palabres, según comenta l’empresariu,
«llegárome al corazón y entós
empecé a estudiar la posibilidá de
sacar esti proyectu alantre y cuál
podía ser el nome». Amás, comenta
que dende la empresa «siempre
tamos buscando novedaes porque
somos mui inquietos. Esti proyectu
lleva años xestándose y por fin sal a la
lluz». Marcos atopó nel llagar unes
cepes del 2008 que taben en barrica
y a partir d’ehí decidió pone-y el nome
de L.lumés. A continuación foi ellaborando
tol procesu del etiquetáu,
que contó cola collaboración de la
Oficina de la L.lingua de Cangas del
Narcea a la hora de tener asesoramientu
llingüísticu.
Non too ye positivo. A pesar de la
bona acoyida que tuvo la idea y
depués de presenciar l’éxitu consiguíu
na presentación del productu
ente la xente, los responsables de
Bodegas Obanca enfréntese agora a
la negativa del Conseyu Regulador y
de la Conseyería de Mediu Rural a
que l’etiquetáu vaiga namás n’asturianu.
Marcos insiste en que nun ta dispuestu
a etiquetar el vinu n’asturianu
y en castellanu y pa ello cuenten «col
apoyu de la xente, así que vamos salir
cola nuestra». De mano, el responsable
d’esta empresa familiar asegura
que «nun hai nenguna llei que nos
obligue a etiquetar el nuestru productu
nos dos idiomes, lo que pasa ye
que’l tema del asturianu incomódalos.
Esa ye la única razón y lo que quieren
cola negativa ye facenos un placaxe».
Otra manera, Marcos defende que
«la competencia tamién ta interesada
nesto, porque agora ven un focu de
lluz pa la viabilidá del vinu de Cangas,
cuando enantes nun s’interesaron
por ello».
L’apueste de David Marcos ye firme
y esplica que «nun va dar marcha
atrás» nin tampoco se-y pasa pela
cabeza retirar el productu porque «el
vinu yá tien un padrín y vamos siguir
alantre. Esto ye como traer un fíu al
mundu». Al empar, Marcos confiesa
que de mano teníen un poco de mieu
a la hora de sacar esti productu novedosu
porque «yera un públicu que
nun conocíemos y foi complicao busca-
y l’enfoque», pero, depués de la
puesta de llargo d’hai unos díes, esti
empresariu cangués ta convencíu de
tirar p’alantre. Según él, foi «un éxitu
total y la xente quedó encantao lo
mesmo col vinu que col etiquetáu».
Tanto ye asina, que’l vinu L.lumés va
presentase n’Uviéu nel chigre La Casa
Posafuelles el xueves 24 de xunu.
L.lumés ye un llugar y una parroquia del conceyu
Cangas, cerca de la villa y nel valle del
ríu L.luiña, con abondanza de viñes. La ilesia
parroquial ye d’estilu románicu popular con
retablos del sieglu XVIII y a la entrada del pueblu pel
camín de Santiago tenemos el L.lagar del Conde,
pero agora de xuru que va sonanos más gracies a
ser el nome escoyíu pa un vinu de calidá de Cangas
etiquetao n’asturianu, un fechu históricu tanto
pal vinu del país como pa la llingua asturiana, al
ser la primer vez que se fai dalgo asina.
Ruxíase yá dende’l branu pasáu que Bodegas
Oubanca diba sacar una botella etiquetada namás
n’asturianu. Anque taba previsto que saliera yá
cuando la fiesta de la vendimia de 2009, nun foi hasta’l
xueves 10 de xunu d’esti añu cuando se fixo la
presentación nel chigre La Bolsa, de Cangas, xunto
a les añaes nueves de les demás marques de la
bodega.
L’actu escomencipió a les 21 hores y, desque
teníes l’acreditación, nun local enllenu xente y
mentanto se proyectaba un reportaxe del trabayu
desarrolláu por Bodegas Oubanca, amás d’unes
diapositives esplicando les característiques del
vinu, la xente arimábase a la barra del chigre a
pidir el vinu que quixere prebar, tinto, blanco o
L.lumés.
Anque Mónica Rodríguez Riesgo, del Serviciu
de Normalización L.lingüística de Cangas y collaboradora
en qu’esti vinu saliere p’alantre, animó a
dir al actu con cachu, por considerar que beber vinu
del país en cristal yera delitu, la copa ganó por
goliada y namás un cachu diba de mano en mano,
mientres cola otra podíes garrar quesu o xamón p’ayudar
al vinu a entrar meyor. Quiciabes al cachu
nun lu ayudó’l tar nun chigre mui cool, al dicir de
dalgunes de les persones qu’asistieron, mayoritariamente
del xéneru masculín como suel ser vezu
nel occidente, ente les que taben conceyales del
Gobiernu y de la oposición, xente de la hostelería
canguesa, Xosé Ambás «el de la tele»(sic), Pepe
Bisuyu,Carlos Camporro de l’Axencia de Desarrollu
Local, José María Azcárate, de la revista La
Maniega, y una representación de la Xunta pola
Defensa de la Llingua Asturiana, organización que
va tener esti vinu n’asturianu a disposición del
públicu nel so chigre La Casa Posafuelles, onde
amás va facese una presentación de L.lumés el
xueves 24 de xunu a les 21 hores.
«Na nueite de San Xuan, las l.lárimas d’un cangués
fixeron que naciera esti vinu», diz la etiqueta
d’esti verdéu tinto que pasó nueve meses en barrica
de carbayu francés y que sal al mercáu en 4.000
botelles, non sin antes poner torgues la Conseyería
de Mediu Rural por dir namás n’asturianu. En
fin, depués quien quier un futuru pa esti idioma tien
qu’aguantar el discursu de la imposición.
Nun quixere acabar estes llinies ensin dar les
gracies a tola xente de Bodegas Oubanca, n’especial
a David, pol so bon facer col vinu en xeneral y por Llumés

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s